Ботайдың бірегей мұрасы Петропавлдағы халықаралық конференцияда талқыланды
Қозыбаев университеті «Ботай – Ұлы дала мәдениеті» халықаралық ғылыми-практикалық конференциясын өткізді. Ботай мәдениетінің бірегей археологиялық мұрасына арналған шара Әзірбайжан, Франция, Түркия, Ресей, АҚШ және Қазақстанның ғалымдары мен сарапшыларын жинады. Конференцияға ҚР Премьер-министрінің орынбасары Ермек Көшербаев, ҚР Ғылым және жоғары білім министрі Саясат Нұрбек, Солтүстік Қазақстан облысының әкімі Ғауез Нұрмұхамбетов қатысты.
Ботай қонысы (б.з.д. 4 мың жыл) – ғалымдар дәлелдегендей, адамзат тарихында алғаш рет жылқы қолға үйретілген бірегей археологиялық орын. 1980 жылдары археолог В.Ф.Зайберт жасаған көрнекті жаңалық бүгінде әлемдік деңгейде танылып отыр.
Солтүстік Қазақстан облысының Айыртау ауданында халықаралық семинар өтті. Ежелгі Ботай елді мекенінің аумағында өткен шараға тарихшылар, әлемнің түрлі елдерінен келген суретшілер, Қозыбаев университетінің басшылығы, ғалымдары, студенттері мен оқытушылары қатысты. Бір апта бойы 15 археолог студент қазба жұмыстарында жұмыс істеді. Экспедицияны белгілі ғалым, Қозыбаев университетінің профессоры Анатолий Плешаков басқарды. Білім алушылар семинар қатысушыларына өз зерттеулерінің нәтижелерін таныстырды.
Шара аясында болашақ жас мамандар үшін ҚР Премьер-министрінің орынбасары Ермек Көшербаевпен кездесу өтті. Олар археологиядағы алғашқы қадамдарымен бөлісті.
«Тарихи ескерткіштер – біздің өркениетіміздің бастауы әрі Қазақстанның және бүкіл түркі дүниесінің баға жетпес мұрасы. Ботай – Солтүстік Қазақстандағы ерекше орын, ол адамзаттың ерте тарихын түсінуге және жылқыны қолға үйрету тарихын ашуға мүмкіндік береді. Мұндай нысандарды зерттеу ата-баба мұрасын сақтау мен болашақ ұрпақты шабыттандыруға ықпал етеді. Сондықтан ғылыми зерттеулерді, мәдени іс-шараларды және туризмді дамытуға жағдай жасау маңызды», – деді вице-премьер.
2011 жылы Қозыбаев университеті ҚР Білім және ғылым министрлігінің Мәдениет комитетімен «Ботай – Еуразия жылқы көшпенділерінің тарихи негізі» ғылыми-қолданбалы жобасын іске асыруға шарт жасасты. Оның аясында Никольское ауылында археологиялық база құрылды, далалық лагерь мен университетте археологиялық олжаларды өңдеу зертханасы жұмыс істейді. Университет Ботайды сақтау және мұражайландыру идеяларын, соның ішінде қалпына келтірілген тұрғын үйлері, мұражай экспозициялары және туристік бағыты бар Археоэтнопарк құру бастамасын белсенді түрде алға тартады.